غلام سرور خان کا قومی فضائی کمپنی سے متعلق بیان ان کی نااہلی تھی، خواجہ آصف

وزیر دفاع خواجہ آصف نے کہا ہے کہ سابق وفاقی وزیر غلام سرور خان کا قومی فضائی کمپنی سے متعلق بیان ان کی نااہلی تھی۔ غلام سرور خان نے ہماری حکومت سمیت ماضی کی حکومتوں پر ذمے داری ڈالنے کی کوشش کی۔

جیو نیوز کے پروگرام آج شاہزیب خانزادہ میں گفتگو کرتے ہوئے خواجہ آصف نے کہا کہ سرور خان نے جعلی لائسنسوں کے حوالے سے جو تعداد بتائی درحقیقت وہ اُس سے بہت کم تھی۔ انکوائری ہوگی تو وہ بتائیں گے کہ سرور خان کو یہ کس نے فِیڈ کیا تھا۔

خواجہ آصف  نے کہا کہ ستمبر میں امریکا سے ریگولیٹرز آرہے ہیں تاکہ ہماری فلائٹس امریکا سے بھی شروع ہو سکیں۔ کوشش ہے کہ 14 اگست سے برطانیہ کی پروازیں شروع ہوجائیں۔

وزیر دفاع نے کہا کہ پی ٹی آئی کے لوگوں کی ہمارے ساتھ دشمنی کم اور آپس میں زیادہ ہوگئی ہے،  پی ٹی آئی والوں کو کسی سیاسی دشمن کی ضرورت نہیں وہ اپنے لیے خود کافی ہیں۔