پاکستان اور قطر کا دو طرفہ اسٹریٹجک شراکت داری مزید مضبوط کرنے کے عزم کا اعادہ
پاکستان اور قطر نے دو طرفہ اسٹریٹجک شراکت داری مزید مضبوط کرنے کے مشترکہ عزم کا اعادہ کیا ہے۔
وزیراعظم شہباز شریف سے قطر کے نائب وزیراعظم شیخ سعود بن عبدالرحمٰن بن الثانی نے ملاقات کی، جس میں دفاع اور سیکیورٹی کے شعبوں میں دو طرفہ تعاون پر تبادلہ خیال کیا گیا۔
اعلامیہ کے مطابق پاکستان اور قطر کے درمیان مضبوط اور تاریخی تعلقات کا اعادہ کیا گیا۔
اعلامیہ کے مطابق وزیراعظم نے دونوں ممالک کی مسلح افواج کے درمیان جاری تعاون پر اظہاراطمینان کیا اور دفاعی تعاون مزید مضبوط اور تعاون کو وسعت دینے کے لیے پاکستان کے عزم کااعادہ کیا۔
اعلامیہ کے مطابق قطری نائب وزیراعظم نے پاک فوج کی پیشہ ورانہ مہارت کو سراہا، شیخ سعود نے دو طرفہ دفاعی شراکت داری کو مزید گہرا کرنے میں قطر کی دلچسپی سےآگاہ کیا۔
اعلامیہ کے مطابق ملاقات میں علاقائی امور بالخصوص ایران اور افغانستان کی صورتحال پر بھی تبادلہ خیال کیا گیا، دونوں رہنماؤں نے خطے میں امن واستحکام کے لیے مذاکرات اور کشیدگی میں کمی کی اہمیت پر زور دیا۔
اعلامیہ کے مطابق ملاقات میں دوطرفہ اسٹریٹجک شراکت داری مزید مضبوط کرنےکے مشترکہ عزم کا اعادہ کیا گیا۔
