جن پاکستانیوں کے پاس سفری دستاویز نہیں وہ زاہدان ڈی پورٹیشن سینٹر پہنچیں، پاکستانی سفیر
ایران میں پاکستان کے سفیر مدثر ٹیپو نے سفری دستاویزات نہ رکھنے والے پاکستانی شہریوں کو زاہدان ڈی پورٹیشن سینٹر پہنچنے کا کہہ دیا۔
تہران سے جاری بیان میں مدثر ٹیپو نے کہا کہ وطن واپسی کے خواہشمند ایسے پاکستانی شہری جن کے پاس سفری دستاویزات نہیں اور وطن واپس آنا چاہتے ہیں، وہ فوری طور پر زاہدان ڈی پورٹیشن سینٹر پہنچیں۔
انہوں نے کہا کہ شہری اپنی شناخت کے لیے قومی شناختی کارڈ یا پاسپورٹ ساتھ لائیں، اصل دستاویز کے ساتھ ساتھ فوٹو کاپی یا الیکٹرانک کاپی بھی قابل قبول ہوگی۔
مدثر ٹیپو کے مطابق ایرانی حکام دستاویزات کی تصدیق کے بعد پاکستانی شہریوں کو پاکستان روانگی کی اجازت دیں گے، اس مقصد کے لیے پاکستانی سرحد پر نادرا کی خصوصی وین بھی تعینات کر دی گئی ہے۔
اُن کا کہنا تھا کہ نادرا ٹیم سرحد پر شہریوں کی شہریت کی تصدیق کرے گی، جس کے بعد انہیں پاکستان میں داخلے کی اجازت دی جائے گی۔
پاکستانی سفیر نے وطن واپس آنے والے شہریوں کے لیے نیک تمناؤں اور محفوظ سفر کی دعا بھی کی ہے۔
