کراچی میں یکم اپریل کی رات سے بارش کا آغاز ہوسکتا ہے، محکمۂ موسمیات

محکمۂ موسمیات کے مطابق مغربی ہواؤں کا سلسلہ یکم اپریل کو ایران کے راستے بلوچستان میں داخل ہوگا جس کے زیرِ اثر کراچی میں یکم اپریل کی رات سے بارش کا آغاز ہوسکتا ہے۔

محکمۂ موسمیات کا کہنا ہے کہ کراچی میں 2 اپریل کو بارش کا امکان زیادہ ہے جبکہ شہر میں 3 اپریل کو بھی بارش کا امکان رہے گا، چند علاقوں میں بارش 50 ملی میٹر یا اس سے زائد بھی ہوسکتی ہے۔

محکمۂ موسمیات کے مطابق اس سسٹم کے زیرِ اثر تیز ہوائیں بھی چل سکتی ہیں جن کی رفتار 50 کلو میٹر یا اس سے زائد ہوسکتی ہے۔

محکمۂ موسمیات کے مطابق 4 اپریل تک یہ سسٹم ملک پر اثر انداز رہ سکتا ہے۔