ہندوستان برصغیر ہے، تاریخ میں کبھی ایک ملک نہیں رہا: خواجہ آصف

وزیرِ دفاع خواجہ محمد آصف کا کہنا ہے کہ ہندوستان برصغیر ہے، تاریخ میں کبھی ایک ملک نہیں رہا، ایک وقت ایسا بھی آیا جب برصغیر میں 500 سے زیادہ ریاستیں تھیں۔

اسلام آباد سے جاری کیے گئے بیان میں وزیرِ دفاع خواجہ محمد آصف نے کہا ہے کہ ہندوستان میں مسلمانوں کی حکمرانی کے دوران کچھ مختصر وقفے آئے، جب ہندوستان بدخشاں سے بنگال تک ایک حکمرانی میں رہا۔

ان کا کہنا ہے کہ اس وقت بھارت میں درجنوں آزادی اور علیحدگی کی مسلح تحریکیں چل رہی ہیں، مودی جیسے حکمراں تاریخ میں جب آئے تو ملک منتشر ہو گئے۔

خواجہ آصف نے مزید کہا ہے کہ ہندو مذہب میں درجنوں ذیلی مذاہب ہیں، نچلی ذاتوں کا روز قتلِ عام ہوتا ہے، مودی اور اس کے حواری ان کے ساتھ ہاتھ ملا لیں تو دھرم بھرشٹ ہو جاتا ہے۔

وزیرِ دفاع خواجہ محمد آصف کا یہ بھی کہنا ہے کہ مودی ایک جاہل شخص ہے، جو اکھنڈ بھارت کی بات کرتا ہے۔