میرے پاس الفاظ نہیں کہ بتا سکوں کہ وزیراعلیٰ بھاٹی گیٹ کے واقعے پر کتنی غمزدہ تھیں: عظمیٰ بخاری

وزیر اطلاعات پنجاب عظمیٰ بخاری نے کہا ہے کہ میرے پاس الفاظ نہیں کہ بتا سکوں کہ وزیراعلیٰ بھاٹی گیٹ کے واقعے پر کتنی غمزدہ تھیں۔

اس حوالے سے عظمیٰ بخاری نے کہا کہ وزیراعلیٰ پنجاب واقعے کی ایک ایک لمحے کی رپورٹ لے رہی تھیں، انکوائری کے لیے 48 گھنٹے کی مہلت دی گئی ہے، وزیراعلیٰ پنجاب بہت تکلیف میں ہیں، میں بتا نہیں سکتی وہ کتنے دکھ میں ہیں۔

عظمیٰ بخاری نے کہا کہ بھاٹی گیٹ پر واقعے سے متعلق پہلی اطلاع ریسکیو 1122 نے دی، بچی کے والد کا پولیس سے رابطہ ہوا، پولیس بچی کے والد کو تھانے لی گئی۔

انہوں نے کہا کہ خاتون کے والد نے بتایا کہ بیٹی کا اپنے شوہر کے ساتھ جھگڑا ہوا تھا، اس لیے پولیس بچی کے والد کو لے گئی، پولیس کو لگا ہوگا کہ شاید شوہر اس معاملے میں ملوث ہے۔

عظمیٰ بخاری کا کہنا ہے کہ جس شخص کی بیوی اور بچی گر گئی، اطلاعات ہیں کہ پولیس نے اس کے ساتھ غلط رویہ رکھا، اس پر بھی تحقیقات ہوں گی، جو بھی ملوث پایا گیا اس کے خلاف کارروائی ہوگی۔

صوبائی وزیر نے کہا کہ پنجاب حکومت جلد بلدیاتی انتخابات چاہتی ہے، بلدیاتی انتخابات کے لیے قانون بننے میں وقت لگا، پنجاب میں حلقہ بندیوں میں بھی وقت لگ رہا ہے، پنجاب حکومت بلدیاتی انتخابات کے لیے تیار ہے۔