مریم نواز کا ستھرا پنجاب ورکرز کو ہر ماہ 5 تاریخ تک تنخواہ ادائیگی کا حکم
وزیرِ اعلیٰ پنجاب مریم نواز نے ستھرا پنجاب ورکرز کو ہر ماہ کی 5 تاریخ تک تنخواہ کی ادائیگی کا حکم دے دیا۔
جاری اعلامیے کے مطابق انہوں نے کمپنیوں سے ورکرز کو ادائیگی کی ماہانہ رپورٹ بھی طلب کر لی ہے۔
مریم نواز نے کہا ہے کہ کام نہ کرنے والوں کے لیے ستھرا پنجاب میں زیرو ٹالرینس پالیسی اپنائی جائے، کارکردگی جانچنے کے لیے ایس او پیز تشکیل دیے جائیں۔
انہوں نے کہا کہ سبزی اور فروٹ منڈیوں کی صفائی پر خصوصی توجہ دی جائے، بہتر نتائج کے لیے مزید محنت کرنا ہو گی۔
وزیرِ اعلیٰ پنجاب نے صبح 5 بجے مرکزی سڑکوں کی دھلائی اور صفائی کا حکم دیا اور ڈور ٹو ڈور ویسٹ کلیکشن یقینی بنانے، اسکول، کالج، یونیورسٹیوں اور اسپتالوں کے گرد صفائی یقینی بنانے کی ہدایت بھی کی۔
انہوں نے بازاروں، کمرشل ایریاز میں ایک جیسے کوڑے دان اور کچرے کے بیگ استعمال کرنے، کمرشل ایریاز سے کچرا ہٹانے کے لیے اوقات کار مقرر کرنے اور مختلف علاقوں میں خالی پلاٹ بھی صاف کرنے کی ہدایت کی۔
