پیرس سے لاہور کی قومی ایئرلائن کی پرواز 2 دن بعد بھی اڑان نہ بھر سکی

قومی ایئر لائن کی پیرس سے لاہور کی پرواز پی کے 734 دو روز بعد بھی اڑان نہ بھر سکی۔

دوسری طرف غیر ملکی ایئر لائن کی دبئی سے کراچی کی پرواز میں 6 گھنٹے کی تاخیر ہوئی، پرواز صبح 10 بج کر 45 منٹ پر کراچی پہنچی تھی۔

دو دن سے اڑان نہ بھرنے والی قومی ایئر لائن کی پیرس سے لاہور کی پرواز کے مسافر شدید پریشان ہیں۔

مسافروں کا کہنا ہے کہ پرواز 8 اگست کی شام ساڑھے 5 بجے پیرس سے لاہور کے لیے روانہ ہونا تھی۔

انہوں نے کہا ہے کہ خواتین، بچوں سمیت مریض پیرس ایئر پورٹ پر پریشان ہیں، کچھ نہیں بتایا جا رہا ہے کہ پرواز کب روانہ ہو سکے گی۔

ترجمان قومی ایئر لائن کے مطابق پیرس پہنچنے کے بعد بوئنگ 777 طیارہ کے انجن میں خرابی سے شیڈول متاثر ہے، طیارے کو پیرس سے اسلام آباد پہنچنا تھا، وہی طیارہ واپسی کی پرواز پر جانا تھا۔

ترجمان کے مطابق ایک بوئنگ طیارے کی فنی خرابی کی وجہ سے پورا شیڈول متاثر ہے، جہاز کی فنی خرابی دور کرنے کی کوشش کر رہے ہیں، کوشش ہے کہ جلد از جلد فلائٹ بحالی کے بعد روانہ ہو سکے۔

قومی ایئر لائن کے حکام کے مطابق انجینئرنگ ٹیم طیارے کی خرابی کو دور کرنے کے لیے کام کر رہی ہے، پیرس میں تمام مسافروں کو ہوٹل منتقل کر دیا گیا ہے۔

ترجمان کے مطابق پیرس میں فنی خرابی کا شکار طیارے کے لیے ضروری پرزے پیرس بھیجے جا رہے ہیں۔