فلسطین کیلئے 100 ٹن امدادی سامان کی کھیپ روانہ

لاہور سے فلسطین کے لیے 100 ٹن امدادی سامان کی ایک اور کھیپ کو بذریعہ خصوصی پرواز روانہ کر دیا گیا۔

پنجاب کے صوبائی دارالحکومت لاہور سے صوبائی وزیر بلال یاسین اور دیگر نے امدادی سامان روانہ کیا۔

اس موقع پر صوبائی وزیر بلال یاسین نے این ڈی ایم اے اور الخدمت فاؤنڈیشن کا بھرپور شکریہ ادا کیا۔

صوبائی وزیر بلال یاسین نے کہا ہے کہ پاکستان ہمیشہ ہر محاذ پر فلسطینی عوام کے شانہ بشانہ رہا ہے اور ان کے لیے آزادی کے لیے ہر ممکن آواز بلند کرتا رہے گا۔

بلال یاسین نے یہ بھی بتایا ہے کہ روانہ کیا جانے والا امدادی سامان بذریعہ مصر فلسطینی بھائیوں تک پہنچایا جائے گا۔

واضح رہے کہ اب تک 28 امدادی کھیپوں کے ذریعے مجموعی طور پر 2700 ٹن سے زائد سامان فلسطین بھجوایا جا چکا ہے۔