بھارتی و افغان میڈیا کا گمراہ کن پروپیگنڈا، کسی نے طیارہ گرنے کی تصدیق نہیں کی، وزارت اطلاعات
وزارت اطلاعات پاکستان کا کہنا ہے کہ پاکستانی لڑاکا طیارہ کے حوالے سے بھارتی اور افغان میڈیا کی جانب سے گمراہ کن پروپیگنڈا کیا جارہا ہے، پاکستانی حکام، عالمی میڈیا اور دفاعی ادارے نے کسی طیارے کے نقصان کی تصدیق نہیں کی۔
وزارتِ اطلاعات کے مطابق افغانستان کی جانب سے جاری تصویر 2021 میں ترکی میں روسی جہاز کے حادثے کی ہے، افغان طالبان رجیم کے آفیشل اکاؤنٹس سے پروپیگنڈا اور جھوٹے دعوے شرمناک ہیں۔
افغان حکام کا بے بنیاد دعویٰ بھارتی اور افغان پروپیگنڈا ذرائع نے بڑے پیمانے پر پھیلایا۔
واضح رہے کہ پاکستان کی جانب سے افغان طالبان رجیم کی بلااشتعال کارروائیوں کا جواب دیتے ہوئے پاکستانی فورسز نے آپریشن غضب للحق کا آغاز کرتے ہوئے ان کے دانت کھٹے کردیے۔
وفاقی وزیرِ اطلاعات عطاء تارڑ کے مطابق آپریشن غضب للحق میں اب تک 331 طالبان رجیم کے اہلکار و خوارج ہلاک اور 500 سے زائد زخمی کر دیے گئے ہیں۔
تاہم اسی دوران افغانی و بھارتی سوشل میڈیا اور مین اسٹریم میڈیا کی جانب فیک ویڈیوز کا سہارا لیتے ہوئے اس بات کا پروپیگنڈا کیا گیا کہ افغان رجیم فورسز نے پاکستانی طیارہ مار گرایا ہے۔
