وزیراعظم شہباز شریف کی محسن نقوی کی رہائش گاہ آمد، عیادت بھی کی

وزیراعظم شہباز شریف نے وفاقی وزیر سینیٹر محسن نقوی کی عیادت کی ہے۔

شہبار شریف نے لاہور میں محسن نقوی کی رہائش گاہ پہنچ کر اُن کی خیریت دریافت کی اور اُن کی صحت یابی کےلیے نیک خواہشات کا اظہار کیا ہے۔

ملاقات کے دوران ملک کی داخلی سیکیورٹی اور مجموعی صورتحال پر تبادلہ خیال کیا گیا، اس موقع پر محسن نقوی نے امن و امان برقرار رکھنے کےلیے اٹھائے گئے اقدامات سے وزیراعظم کو آگاہی دی۔

وزیراعظم شہباز شریف نے داخلی سلامتی سے متعلق اقدامات پر اطمینان کا اظہار کیا اور کہا کہ عوام کی جان و مال کے تحفظ کےلیے کوئی کسر اٹھا نہ رکھی جائے۔

وزیر داخلہ نے وزیراعظم سے کہا کہ میں ذاتی طور پر سیکیورٹی انتظامات کی مانیٹرنگ کر رہا ہوں۔

واضح رہے کہ محسن نقوی گزشتہ اتوار کو اسلام آباد میں مظاہرین سے بات چیت کے دوران زخمی ہوئے تھے۔