فضل الرحمان کا پیٹرول قیمت میں اضافے پر جمعے کو احتجاج کا اعلان
جمعیت علماء اسلام (جے یو آئی) کے سربراہ مولانا فضل الرحمان نے پیٹرولیم مصنوعات کی قیمتوں میں اضافے پر جمعےکو احتجاج کا اعلان کردیا۔
پشاور میں پریس کانفرنس کے دوران مولانا فضل الرحمان نے کہا کہ جے یو آئی کی مرکزی مجلس شوریٰ کا 2 روزہ اجلاس ہوا، جس میں ملکی و بین الاقوامی صورتحال پر غور کیا گیا۔
انہوں نے کہا کہ حالیہ پیٹرولیم مصنوعات میں اضافے نے ہر فرد کو ہلا کر رکھ دیا ہے، عام آدمی کا سکون چھین لیا گیا ہے، آئندہ جمعہ کو احتجاجی مظاہرے کریں گے۔
جے یو آئی سربراہ نے مزید کہا کہ گھریلو تشدد، ٹرانس جینڈر، 18 سال سے کم عمر شادی پر پابندی سمیت دیگرخلاف شریعت قوانین ختم کیے جائیں۔
اُن کا کہنا تھا کہ بیوی کو خاوند کے جائیداد میں 50 فیصد حصہ دینے سے متعلق قوانین کی تیاریاں کی جارہی ہیں، انگریز چلا گیا مگر ان کے قوانین مسلسل پاس ہو رہے ہیں۔
انہوں نے کہا کہ ہمارا موقف ہے کہ ن لیگ کی حکومت جعلی اور پیپلز پارٹی کے سہارے کھڑی ہے، ہمیں حق حاصل ہے کہ ایسی حکومت کے خلاف علم بغاوت اٹھائیں۔
