تائیوان جلد ڈرون بنائے اور خریدے، امریکی رکن کانگریس

تائی پے(جنگ نیوز) امریکی کانگریس کی رکن ینگ کم نے تائیوان پر زور دیا ہے کہ وہ ڈرونز کی خریداری اور مقامی پیداوار سے متعلق مجوزہ دفاعی بل جلد منظور کرے، خبردار کرتے ہوئے کہا کہ “وقت بہت کم ہے” اور چین کے ممکنہ حملے کے خطرے کے پیش نظر تائیوان کو بڑے پیمانے پر ڈرونز خریدنے اور تیار کرنے کی ضرورت ہے۔ تائی پے میں صدر لائی چنگ تے سے ملاقات کے دوران انہوں نے کہا کہ یوکرین اور ایران کی جنگوں نے ثابت کر دیا ہے کہ جدید جنگوں میں ڈرونز فیصلہ کن کردار ادا کرتے ہیں۔ صدر لائی نے 2030 تک دفاعی اخراجات کو مجموعی قومی پیداوار (جی ڈی پی) کے پانچ فیصد تک بڑھانے کے عزم کا اعادہ کرتے ہوئے کہا کہ تائیوان دفاعی صلاحیت، فوجی ذخائر اور سماجی دفاعی تیاری کو مزید مضبوط بنائے گا۔ حکومت نے مقامی ساختہ نگرانی، حملہ آور اور سمندری ڈرونز کے لیے 6.5 ارب ڈالر کے منصوبے کی تجویز دی ہے، جبکہ اپوزیشن جماعت کومن تانگ بھی ڈرونز کے لیے الگ فنڈ کی حامی ہے لیکن سالانہ اخراجات محدود رکھنے کی خواہاں ہے۔