قائد اعظم کےپاکستان سے نوآبادیاتی قوانین کو ختم کرنا چاہئے ،تجزیہ کار

جیوکے پروگرام کیپٹل ٹاک میں میزبان حامد میر نے تجزیہ پیش کرتے ہوئے کہا کہ اگر اس پاکستان کو قائد اعظم کا پاکستان بنانا چاہتے ہیں تو اس پاکستان سے نوآبادیاتی قوانین کو ختم کرنا چاہئے۔

مثلاً پاکستان پینل کورٹ 1860 اسی طرح سی آر پی سی، سی سی پی 1908ء اور دفعہ 144 یہ سب انگریزوں کے قانون ہیں، ان سب قوانین کو اراکین پارلیمنٹ کو ختم کرنا چاہیے۔

لارڈ ماؤنٹ بیٹن اپنی کتاب میں اعتراف کرتے ہیں کہ وہ قیام پاکستان کے خلاف تھے اور قائد اعظم کو روکنے کی کوشش کی اور وہ کہتے ہیں کہ اگر قائد اعظم 2 سال پہلے فوت ہوجاتے تو پاکستان نہ بنتا اور قائد اعظم متحدہ ہندوستان کے وزیراعظم بھی نہیں بننا چاہتے تھے چونکہ انہیں ہندو راج کا خدشہ تھا۔

لارڈ ماؤنٹ بیٹن کہتے ہیں کہ میں قائد اعظم کے سامنے بری طرح ناکام ہوا، پاکستان کا یوم آزادی 14 اگست کو اس لیے بنایا چونکہ 15 اگست سامراجی طاقتوں کی میراث تھی اور جاپان کے خلاف فتح کا دن تھا، ہندوستان نے اس کو قبول کیا لیکن پاکستان نے فیصلہ کیا کہ اسے قبول نہیں کریں گے۔