کشمیریوں کی قربانیوں کے سامنے دنیا کی خاموشی ایک سنگین اخلاقی ناکامی بن چکی ہے: محسن نقوی
وزیرِ داخلہ محسن نقوی نے یومِ یکجہتی کشمیر کے موقع پر کشمیری عوام کے ساتھ بھرپور یکجہتی کا اظہار کیا ہے۔
اپنے پیغام میں محسن نقوی نے کہا کہ پاکستان کا بچہ بچہ مظلوم کشمیری عوام کے ساتھ غیر متزلزل عزم کا اظہار کرتا ہے۔
انہوں نے کشمیریوں کی طویل جدوجہد اور بے مثال قربانیوں کو خراجِ تحسین پیش کرتے ہوئے کہا کہ مقبوضہ کشمیر کے عوام گزشتہ 7 دہائیوں سے بھارتی جبر کے خلاف استقامت کی ایک لازوال تاریخ رقم کر رہے ہیں۔
ان کا کہنا تھا کہ ظلم، محاصرے اور خوف کے ماحول کے باوجود کشمیری عوام کا آزادی کا جذبہ آج بھی پوری آب و تاب کے ساتھ زندہ ہے، کشمیریوں کی قربانیوں کے سامنے دنیا کی خاموشی ایک سنگین اخلاقی ناکامی بن چکی ہے۔
محسن نقوی نے کہا کہ اقوام متحدہ کی قراردادیں آج بھی کشمیری عوام کے حقِ خود ارادیت کی واضح تصدیق کرتی ہیں، تنازعہ کشمیر کے حل کے بغیر خطے میں پائیدار امن کا خواب کبھی حقیقت میں نہیں بدل سکتا۔
وزیرِ داخلہ نے اس عزم کا اعادہ کیا کہ پاکستان کشمیری عوام کے جائز حق کے لیے ہر عالمی فورم پر آواز بلند کرتا رہا ہے اور آئندہ بھی کرتا رہے گا۔
