فیلڈ مارشل عاصم منیر کی سعودی وزیرِ دفاع سے ملاقات، ایرانی حملوں پر تبادلۂ خیال
فیلڈ مارشل سید عاصم منیر نے سعودی وزیر دفاع شہزادہ خالد بن سلمان سے ملاقات کی ہے۔
پاک فوج کے شعبۂ تعلقاتِ عامہ (آئی ایس پی آر) کے مطابق دورۂ سعودی عرب میں ہونے والی ملاقات میں ایرانی ڈرون اور میزائل حملوں سے پیدا ہونے والی سیکیورٹی صورتِ حال پر تبادلۂ خیال کیا گیا۔
اس موقع پر دونوں شخصیات نے حملوں کو روکنے کے لیے اسٹریٹجک دفاعی معاہدے کے تحت اقدامات پر بھی تبادلۂ خیال کیا اور ملاقات میں زور دیا کہ بلاوجہ جارحیت خطے کی سیکیورٹی اور استحکام کے لیے خطرہ ہے۔
آئی ایس پی آر کے مطابق دونوں فریقین نے کہا کہ بلاوجہ حملے امن کے لیے مذاکرات کے امکانات کو محدود کرتے ہیں اور بحران کو بڑھاتے ہیں اور امید کرتے ہیں کہ ایران سمجھداری اور دانشمندی کا مظاہرہ کرے گا۔
آئی ایس پی آر کا کہنا ہے کہ فیلڈ مارشل سید عاصم منیر اور سعودی وزیر دفاع شہزادہ خالد بن سلمان نے کہا کہ ایران کی محتاط حکمتِ عملی سے دوست ممالک کو بحران کے پُرامن حل کی کوششوں میں مدد ملے گی۔
علاوہ ازیں ملاقات میں علاقائی سیکیورٹی اور دوستی کے فروغ کے لیے تعاون مضبوط کرنے پر بھی اتفاق ہوا، دونوں ملکوں نے باہمی تعاون اور تعلقات کو مزید مستحکم بنانے کا عزم بھی ظاہر کیا۔
