1973ء کا آئین قومی وحدت کی علامت ہے: آصف علی زرداری

صدرِ مملکت آصف علی زرداری نے یومِ دستور کے موقع پر خصوصی پیغام جاری کیا ہے۔

آصف علی زرداری نے اپنے پیغام میں کہا ہے کہ 1973ء کا آئین قومی وحدت کی علامت، ریاست کا بنیادی قانونی و سیاسی فریم ورک ہے جو طویل مشاورت اور اتفاقِ رائے کا نتیجہ تھا۔

اُنہوں نے کہا کہ آئین کی متفقہ منظوری اس کی سب سے بڑی طاقت ہے، تمام چیلنجز کے باوجود آئین نے ریاستی تسلسل برقرار رکھا، یہ آئین اداروں کی بحالی اور استحکام کی بنیاد فراہم کرتا ہے۔

صدرِ مملکت نے کہا کہ شہید ذوالفقار علی بھٹو 1973ء کے آئین کے معمارِ اعظم تھے، سیاسی جماعتوں نے مختلف ادوار میں آئین کا دفاع کیا۔

اُنہوں نے کہا کہ شہید محترمہ بینظیر بھٹو نے جمہوریت کی بحالی میں اہم کردار ادا کیا، میثاقِ جمہوریت جمہوری نظام کی بحالی کی بنیاد بنا، آئین عدالتوں، تعلیمی اداروں اور انتظامیہ کے نظام کو متعین کرتا ہے۔

آصف علی زرداری نے مزید کہا کہ آئین کا اطلاق عوامی حقوق کے تحفظ کو یقینی بناتا ہے، عوام ہی اپنے مقدر کے اصل مالک ہیں۔

اُنہوں نے یہ بھی کہا کہ آئین کی اہمیت اس کے مخلصانہ نفاذ میں مضمر ہے، مضبوط جمہوریت کے لیے آئین پر عمل درآمد ناگزیر ہے۔