اپوزیشن کیساتھ مذاکرات کیلئے تیار ہیں، تالی دونوں ہاتھوں سے بجتی ہے: وزیرِ اعظم شہباز شریف

وزیرِ اعظم شہباز شریف کا کہنا ہے کہ اپوزیشن کے ساتھ مذاکرات کے لیے تیار ہیں، تالی دونوں ہاتھوں سے بجتی ہے۔

وزیرِ اعظم محمد شہباز شریف کی زیرِ صدارت وفاقی کابینہ کا اجلاس آج اسلام آباد میں منعقد ہوا۔

وفاقی کابینہ کے اجلاس میں گفتگو کرتے ہوئے انہوں نے کہا ہے کہ اپوزیشن پر منحصر ہے کہ وہ کب تک مذاکرات کی میز پر آتے ہیں۔

شہباز شریف کا کہنا ہے کہ ڈیزل کی فی لیٹر قیمت میں 32 روپے کی کمی خوش آئند ہے، خطے کے کئی ممالک میں ریفائنریز اور گیس پلانٹ بند ہیں۔

انہوں نے کہا کہ وزارتِ پیٹرولیم کی کاوشیں قابلِ تحسین ہیں، عالمی صورتِ حال کے اثرات پاکستان پر بھی مرتب ہوتے ہیں، حکومت نے مشکل حالات میں عوام کو ریلیف دینے کے لیے 128 ارب روپے مختص کیے۔

ان کا کہنا ہے کہ 128 ارب روپے کے لیے وفاقی حکومت نے پی ایس ڈی پی میں کٹوتی کی، عام آدمی کو ریلیف کی فراہمی میں صوبوں نے بھی ساتھ دیا، معیشت کے استحکام کے لیے اقدامات کیے ہیں۔

دفاعی افواج ایکٹ کے مسودے کی منظوری

وفاقی کابینہ نے دفاعی افواج ایکٹ 2026ء کے مسودے کی منظوری دے دی ہے۔

اعلامیے کے مطابق یہ مسودہ 27 ویں آئینی ترمیم کے ذریعے کی گئی ترامیم کے تسلسل میں تیار کیا گیا ہے، مقصد چیف آف ڈیفنس فورسز کے عہدے، چیف آف ڈیفنس فورسز ہیڈ کوارٹرز پر متعلقہ انتظامی امور کا تعین کرنا ہے۔

اعلامیے میں کہا گیا ہے کہ کابینہ کی منظوری کے بعد دفاعی افواج ایکٹ 2026ء پارلیمان کے اجلاس میں منظوری کے لیے پیش کیا جائے گا۔

اعلامیے کے مطابق وفاقی کابینہ نے نیشنل کمانڈ اتھارٹی ایکٹ 2010ء میں ترمیم کی بھی منظوری دے دی۔