قائداعظم کی رہنمائی آج بھی ہمارے لیے مشعلِ راہ ہے: صدرِ مملکت

صدر مملکت آصف علی زرداری نے قائداعظم محمد علی جناح کو ان کی 77ویں برسی پر خراجِ عقیدت پیش کیا ہے۔

ایک بیان میں آصف علی زرداری نے کہا کہ قائداعظم محمد علی جناح نے قوم کو شناخت، خوداری اور آزادی دی۔

اُنہوں نے کہا کہ دو قومی نظریہ آج بھی درست ثابت ہو رہا ہے، بھارت میں اقلیتوں سے سلوک دو قومی نظریے کی سچائی کا ثبوت ہے، پاکستان کا قیام ایک تاریخی اور ناگزیر فیصلہ تھا۔

صدرِ مملکت نے کہا کہ قائداعظم کا وژن، جمہوریت، انصاف، مساوات اور رواداری پر مبنی پاکستان ہے، ہمیں قائد کے اصولوں پر عمل کرتے ہوئے آگے بڑھنا ہوگا، قائداعظم کی رہنمائی آج بھی ہمارے لیے مشعلِ راہ ہے۔

اُنہوں نے کہا کہ پاکستانی نوجوانوں کو مواقع، خواتین کو اختیار اور اقلیتوں کو تحفظ دینا ہو گا۔

آصف علی زرداری نے کہا کہ جمہوریت اور قانون کی حکمرانی سے ہی روشن مستقبل ممکن ہے، پاکستان چیلنجز سے نمٹنے کی صلاحیت رکھتا ہے۔

اُنہوں نے مزید کہا کہ قائداعظم کے خواب کی تعبیر ایک ترقی یافتہ، خوشحال اور مضبوط پاکستان ہے۔