وزیراعلیٰ نے سندھ کی تقسیم کیخلاف قرارداد پیش کردی

وزیراعلیٰ سید مراد علی شاہ نے سندھ اسمبلی میں صوبے کی تقسیم کے خلاف قرارداد پیش کردی۔

ایوان میں خطاب کے دوران وزیراعلیٰ سندھ مراد علی شاہ نے کہا کہ سندھ کوتوڑنے کی باتیں کی جارہی ہیں۔

انہوں نے کہا کہ کراچی میں الگ صوبہ بنانے اور سندھ کو توڑنے کی باتوں کی مذمت کرتا ہوں، سندھ پاکستان بنانے والا صوبہ ہے۔

مراد علی شاہ نے مزید کہا کہ نئےصوبے بنانے کےلئے اس اسمبلی کی دو تہائی اکثریت چاہیے،آپ اس قرارداد کی مخالفت کرتے ہیں تو سندھ کو توڑنے کی بات کرتے ہیں۔

اُن کا کہنا تھا کہ پاکستان سے محبت کرنے والا ہر شخص اس قرارداد کی حمایت کرے گا، یہ مہم اس لئے چلائی گئی کہ پاکستان میں وحدانیت اور امن کو ختم کیا جائے۔

وزیراعلیٰ سندھ نے یہ بھی کہا کہ کراچی میں کیا ہونا چاہیے، اس پر بات کی جاسکتی ہے، سندھ کی توڑ پھوڑ کا جو سوچ رہے ہیں، وہ غلط بیانی ہے۔