ڈاکٹر کی مبینہ غفلت سے خاتون کی موت، اسپتال کو 2 کروڑ روپے ہرجانہ ادا کرنے کا حکم
کراچی کی عدالت نے ڈاکٹر کی مبینہ غفلت سے خاتون کی موت کے کیس میں میڈیکل سینٹر کو 2 کروڑ روپے ہرجانہ ادا کرنے کا حکم دے دیا۔
سینئر سول جج وسطی کی عدالت میں کیس کی سماعت ہوئی۔
عدالت میں متاثرہ خاندان نے ہرجانے کا دعویٰ دائر کیا تھا، مقدمے میں مدعی اپنے دو کمسن بچوں کے ہمراہ بطور فریق عدالت میں پیش ہوا۔
حکمنامے میں کہا گیا کہ سی سیکشن میں آئی سی یو سہولت نہ ہونا سنگین غفلت ہے، ڈاکٹروں نے معیاری طبی احتیاطی تدابیر اختیار نہیں کیں۔
درخواست گزار نے کہا کہ خاتون کو زچگی کے لیے نجی اسپتال میں داخل کیا گیا تھا، بروقت خون اور مناسب طبی سہولتیں فراہم نہیں کی گئیں، مریضہ کو تشویشناک حالت میں دوسرے اسپتال منتقل کیا گیا جہاں دم توڑ گئی، اسپتال میں ایمرجنسی اور وینٹی لیٹر سہولتیں موجود نہیں تھیں۔
متعلقہ گائناکالوجسٹ آپریشن کے بعد فوری طور پر اسپتال چھوڑ گئی، کئی گھنٹوں بعد ڈاکٹر کی واپسی تک مریضہ کی حالت مزید بگڑ چکی تھی۔
