نہر سے ملی خاتون کی گلا کٹی لاش کے کیس کا ڈراپ سین

سرگودھا میں خاتون کے قتل کا ڈراپ سین ہو گیا، دوسری شادی کی خواہش میں مبتلا شوہر ہی قاتل نکلا۔

پولیس نے جدید ٹیکنالوجی کی مدد سے مقتولہ کے شوہر اور اس کے بھائی کو گرفتار کر لیا۔

پولیس کے مطابق 9 مئی کو نہر سے خاتون کی گلا کٹی لاش ملی تھی، مقتولہ کی شناخت کے بعد شوہر سے تفتیش کی گئی تھی۔

پولیس کا کہنا ہے کہ شوہر نے بیوی کو قتل کر کے لاش نہر میں پھینکنے کا اعتراف کر لیا ہے۔

دوسری شادی کی خاطر ملزم نے پہلی بیوی کو قتل کیا۔

پولیس کے مطابق ملزم نے قتل کے اگلے دن دوسری شادی کر لی تھی، گرفتار ملزم احسن اور اس کے بھائی سے آلۂ قتل بھی برآمد کر لیا گیا ہے۔

تفتیش کے دوران ملزم نے اعترافِ جرم کرتے ہوئے بتایا کہ اس نے اپنے بھائی کی مدد سے تیز دھار آلے سے بیوی کا گلا کاٹ کر اسے نہر میں پھینکا تھا۔