جھنگی چیک پوسٹ پر خودکش حملہ، 3 پولیس اہلکار زخمی

تونسہ شریف میں جھنگی چیک پوسٹ پر خودکش حملے کے نتیجے میں تین پولیس اہلکار زخمی ہوگئے جبکہ حملہ آور ہلاک ہوگیا۔

ڈسٹرکٹ پولیس آفیسر (ڈی پی او) صادق بلوچ کے مطابق دھماکا خیز مواد سے بھری ایک گاڑی چیک پوسٹ کے مرکزی گیٹ سے ٹکرا گئی، جس کے نتیجے میں زور دار دھماکا ہوا۔

ڈی پی او کا کہنا ہے کہ دھماکے سے چیک پوسٹ کو نقصان پہنچا جبکہ تین پولیس اہلکار زخمی ہوئے۔ حملے کے بعد پولیس اور قانون نافذ کرنے والے اداروں نے علاقے کو گھیرے میں لے کر سرچ آپریشن شروع کر دیا۔

انہوں نے بتایا کہ خودکش حملہ آور بھی دھماکے میں مارا گیا ہے۔ واقعے کے بعد شواہد اکٹھے کیے جا رہے ہیں اور تحقیقات جاری ہیں۔

سیکیورٹی حکام کے مطابق زخمی اہلکاروں کو طبی امداد کے لیے اسپتال منتقل کر دیا گیا ہے، جبکہ علاقے میں سیکیورٹی مزید سخت کر دی گئی ہے۔