میرپورخاص: 55 سالہ شخص کی 2 کم عمر لڑکیوں سے جنسی زیادتی، ملزم گرفتار
میرپورخاص میں پولیس نے دو کم عمر لڑکیوں سے جنسی زیادتی کا مقدمہ درج کرکے 55 سالہ ملزم گرفتار کرلیا۔
آئی جی سندھ نے بھی واقعہ کا نوٹس لیتے ہوئے ڈی آئی جی میرپورخاص سے تفصیلات طلب کرلیں اور ملزم سے کسی قسم کی رعایت نہ کرنے کی ہدایت دی ہے۔
پولیس کے مطابق ملزم کے خلاف ایک متاثرہ لڑکی کے والد کی مدعیت میں زنا باالجبر کا مقدمہ درج کرکے گرفتار کیا۔ واقعہ گزشتہ روز سامنے آیا، دونوں متاثرہ لڑکیاں آپس میں کزنز ہیں۔
مقدمہ کے مطابق ملزم دونوں بچیوں کو زبردستی قریبی خالی اسکول کی عمارت لے گیا اور مبینہ زیادتی کا نشانہ بنایا۔ دونوں متاثرہ لڑکیوں کو میڈیکل کیلئے سول اسپتال منتقل کیا گیا ہے۔
ادھر پولیس نے گرفتار ملزم کو جوڈیشل مجسٹریٹ کی عدالت میں پیش کردیا۔ عدالت نے ملزم کو جیل بھیجنے کا حکم دیتے ہوئے 7 اگست کو ملزم اور متاثرہ لڑکیوں کو بیانات کیلئے طلب کیا ہے۔
