روس-امریکہ ڈیزل معاہدے کی ترسیل میں 15 سے 20 دن لگیں گے‘ روس

ماسکو (اے ایف پی)روس-امریکہ ڈیزل معاہدے کی ترسیل میں 15سے 20دن لگیں گے: روس، تجارتی شرائط اور معاہدوں کی حتمی شکل پر بات چیت جاری ہے، روسی نائب وزیراعظم الیگزینڈر نوواک ۔ تفصیلات کے مطابق روس کے ایک اعلیٰ عہدیدار نے اتوار کے روز نشر ہونے والے ایک انٹرویو میں کہا کہ معاہدوں پر دستخط ہونے کے بعد روسی ڈیزل امریکی منڈی تک پہنچانے میں 15 سے 20 دن لگیں گے، تاہم ابھی تک معاہدوں پر دستخط کی تاریخ کا اعلان نہیں کیا گیا۔ امریکی صدر ڈونلڈ ٹرمپ نے گزشتہ ہفتے ماسکو کے ساتھ اس متنازع معاہدے کا اعلان کیا تھا۔ اسے 3 نومبر کو ہونے والے اہم وسط مدتی انتخابات سے قبل امریکی صارفین کے لیے ایندھن کی قیمتیں کم کرنے کی کوشش کے طور پر دیکھا جا رہا ہے۔ روس کے نائب وزیراعظم برائے توانائی الیگزینڈر نوواک نے سرکاری میڈیا ادارے ’’ویسٹی‘‘ کو انٹرویو دیتے ہوئے کہا، ’’اس وقت تجارتی شرائط کے حوالے سے مذاکرات جاری ہیں، یعنی معاہدوں کو حتمی شکل دینے پر بات چیت ہو رہی ہے۔‘‘ نوواک نے کہا، ’’معاہدوں پر دستخط ہوتے ہی ایندھن 15 سے 20 دن کے اندر منڈیوں تک پہنچ جائے گا، اس معاملے میں امریکی منڈیوں تک۔‘‘ تاہم، انہوں نے معاہدوں پر دستخط کی کوئی تاریخ نہیں بتائی۔