دریائے چناب میں ہیڈ تریموں اور پنجند پر بہاؤ میں کمی آنا شروع

دریائے چناب میں ہیڈ تریموں اور پنجند پر بہاؤ میں کمی آنا شروع ہوگئی جبکہ گڈو بیراج پر پانی کی آمد میں اضافہ ریکارڈ کیا گیا ہے۔

گڈو بیراج پر پانی کی آمد بڑھ کر 4 لاکھ 25 ہزار کیوسک ہوگئی ہے۔

فلڈ فورکاسٹنگ ڈویژن لاہور کے مطابق ہیڈ تریمو ں پر بہاؤ کم ہوکر 5 لاکھ کے قریب اور پنجند پر 4 لاکھ 52 ہزار پر آگیا۔

دریائے راوی میں ہیڈ سدھنائی پر انتہائی اونچے درجے کا سیلاب ہے جہاں بہاؤ بڑھ کر ایک لاکھ 35 ہزار کیوسک ہوگیا۔

دریائے ستلج میں گنڈا سنگھ والا پر بھی انتہائی اونچے درجے کا سیلاب ہے۔ پانی کا بہاؤ بڑھ کر 3 لاکھ 27 ہزار کیوسک ہوگیا۔

ہیڈ سلیمانکی اور ہیڈ اسلام پر اونچے درجے کے سیلاب برقرار ہیں۔ ہیڈ اسلام پر پانی کی آمد میں اضافہ ہوا ہے اور بہاؤ بڑھ کر ایک لاکھ 25 ہزار کیوسک ہوگیا۔