اسحاق ڈار کی تاجک وزیرِ خارجہ سے ملاقات، علاقائی امن کے فروغ پر اتفاق
شنگھائی تعاون تنظیم کی وزرائے خارجہ کونسل کے اجلاس کے موقع پر نائب وزیرِاعظم اور وزیرِ خارجہ اسحاق ڈار نے تاجکستان کے وزیرِ خارجہ سراج الدین سے ملاقات کی۔
دفتر خارجہ کے ترجمان کے مطابق ملاقات میں پاکستان اور تاجکستان کے درمیان دیرینہ، برادرانہ اور قریبی تعلقات کے عزم کا اعادہ کیا گیا۔
دونوں رہنماؤں نے تجارت، سرمایہ کاری، روابط، توانائی، ثقافت اور عوامی سطح پر روابط کے شعبوں میں تعاون مزید بڑھانے پر اتفاق کیا۔
ملاقات کے دوران دو طرفہ شراکت داری کو مزید مضبوط بنانے کے لیے اعلیٰ سطح پر مسلسل رابطوں کی اہمیت پر زور دیا گیا۔
تاجک وزیرِ خارجہ نے علاقائی امن و استحکام کے لیے پاکستان کی کوششوں کی حمایت کا اعادہ کرتے ہوئے علاقائی مسائل کے پُرامن حل کے لیے پاکستان کی مسلسل کاوشوں کی تائید کی۔
ترجمان کے مطابق اسحاق ڈار اور تاجک وزیرِ خارجہ نے علاقائی اور عالمی پیش رفت پر بھی تبادلۂ خیال کیا اور امن، استحکام اور خوشحالی کے فروغ کے لیے کثیرالجہتی فورمز پر باہمی تعاون کی اہمیت پر زور دیا۔
