وفاقی وزیر علی پرویز ملک نے پیٹرول 1 ہزار کا لیٹر ہونے کا خدشہ ظاہر کردیا

وفاقی وزیر پیٹرولیم علی پرویز ملک نے پیٹرول کی فی لیٹر قیمت 1 ہزار روپے تک جانے کا خدشہ ظاہر کردیا۔

علی پرویز ملک نے لاہور کے علاقے باغبانپورہ میں ن لیگی کارکن میاں عامر الطاف کی رہائشگاہ پر والدہ کی تعزیت کے بعد میڈیا سے گفتگو کی۔

انہوں نے کہا کہ فی الحال ملک میں پیٹرول کی کوئی قلت نہیں تاہم اگر قلت پیدا ہوگئی تو فی لیٹر قیمت 1 ہزار روپے تک بھی جا سکتی ہے۔

وفاقی وزیر نے مزید کہا کہ جماعت اسلامی لوگوں کی تکالیف پر سیاست چمکانے سے گریز کرے۔ گزشتہ روز 1 دن میں 18 کروڑ روپے کے ٹوکن جاری کیے گئے۔

اُن کا کہنا تھا کہ ایک ذمے دار وزیراعظم کے طور پر شہباز شریف نے پیٹرول کی قیمت کے آگے بند باندھا ہے۔

علی پرویز ملک نے یہ بھی کہا کہ عالمی منڈی میں تیل کی قیمت میں 80 فیصد اضافہ ہوا، لیکن ہمارے ہاں صرف 50 فیصد اضافہ کیا گیا۔

انہوں نے کہا کہ جماعت اسلامی کے وفد کو بتادیا تھا کہ ہمیں چیلنجز کا سامنا ہے۔

وفاقی وزیر کا کہنا تھا کہ وہ پی ٹی آئی والوں سے کہیں گے کہ وہ حکومت کی مخالفت میں دوسروں کے بچوں کو ایندھن نہ بنائیں، اسلام آباد پر کسی کو چڑھائی کی اجازت نہیں دیں گے۔

علی پرویز ملک کا کہنا تھا کہ سردیوں میں عوام کو گیس کی تنگی نہیں ہونے دیں گے۔ چاہے 3 کی بجائے 100 ملین ڈالر کی گیس منگوانا پڑے۔

ایک سوال کے جواب میں وفاقی وزیر کا کہنا تھا کہ بلدیاتی نظام اور انتظامی یونٹس کے معاملے پر اسمبلی میں بحث کریں گے۔

دوسری جانب انہوں نے بانی پی ٹی آئی کی بہن علیمہ خان کو حراست میں لیے جانے پر لاعلمی کا اظہار کیا۔