پاک کویت چوتھے دو طرفہ سیاسی مشاورتی مذاکرات

پاکستان اور کویت کے درمیان چوتھے دو طرفہ سیاسی مشاورتی مذاکرات ہوئے ہیں۔

ترجمان دفترِ خارجہ نے بتایا ہے کہ مذاکرات میں پاکستانی وفد کی قیادت ایڈیشنل سیکریٹری برائے مشرقِ وسطیٰ شہر یار اکبر اور کویتی وفد کی قیادت اسسٹنٹ وزیرِ خارجہ برائے ایشیائی امور نے کی۔

مذاکرات کے دوران دو طرفہ تعلقات، تجارت، سرمایہ کاری، قونصلر امور اور علاقائی صورتِ حال پر تبادلۂ خیال کیا گیا۔

اس موقع پر پاکستان اور کویت نے تعاون کو مزید وسعت دینے پر اتفاق کیا۔

فریقین نے دو طرفہ اعلیٰ سطح کے روابط اور باہمی تعلقات کی رفتار پر اطمینان کا اظہار بھی کیا۔

ترجمان دفترِ خارجہ کے مطابق پاک کویت مذاکرات کا اگلا دور اسلام آباد میں باہمی رضا مندی سے طے شدہ تاریخ پر ہو گا۔