عالمی صورتحال، وزیراعظم شہباز شریف نے پارلیمانی لیڈرز کا اجلاس طلب کرلیا

وزیراعظم شہباز شریف نے عالمی صورتحال پر پارلیمانی لیڈرز کا اجلاس کل طلب کرلیا۔

وزیر اعظم کے سیاسی مشیر سینیٹر رانا ثنااللّٰہ کا کہنا ہے کہ پارلیمانی لیڈرز کے ان کیمرا اجلاس میں محمود خان اچکزئی کے ساتھ چیئرمین پی ٹی آئی بیرسٹر گوہر کو بھی دعوت دی ہے۔

انہوں نے کہا کہ وزیراعظم نے کل دن ساڑھے 11 بجے تمام پارٹی سربراہان اور پارلیمانی لیڈرز کو مدعو کیا ہے۔

رانا ثناء اللّٰہ نے مزید کہا کہ خطے کی موجودہ صورتحال اور ایران پر جو حملہ ہوا ہے، اس پر بریفنگ کیلئے سب کو دعوت دی ہے۔

اُن کا کہنا تھا کہ وزیراعظم کی ہدایت کے مطابق اپوزیشن لیڈران اور پارٹی سربراہان کو دعوت دینے آئے ہیں، اپوزیشن لیڈران کو کہا ہے کہ ذاتی اور جماعتی سیاست سے بالاتر ہوکر مشورے کی ضرورت ہے۔