پاکستان اور فرانس کے درمیان پیرس میں کثیرالجہتی امور پر مشاورت
پیرس میں پاکستان اور فرانس کے درمیان کثیرالجہتی امور پر مشاورت ہوئی ہے، پاکستانی وفد کی قیادت اقوام متحدہ امور کے خصوصی سیکریٹری سفیر نبیل منیر نے کی۔
فرانسیسی وفد کی قیادت انسانی حقوق اور فرانکو فونی کی ڈائریکٹر ناتھالی بروڈ ہرسٹ نے کی۔
اس موقع پر پاکستان اور فرانس نے کثیرالجہتی شعبے میں تعاون اور مذاکرات مزید مضبوط بنانے کے عزم کا اعادہ کیا۔
دونوں ممالک نے کثیرالجہتی نظام اور اقوام متحدہ کے چارٹر کے اصولوں کے فروغ پر اتفاق کیا۔
پاکستان اور فرانس نے اقوام متحدہ اور امن وسلامتی کے امور پر رابطہ کاری مضبوط بنانے پر بھی اتفاق کیا۔
مشاورت میں اقوام متحدہ کی امن مشنز، انسداد دہشت گردی اور اقوام متحدہ میں اصلاحات پر بھی گفتگو کی گئی۔
پاکستان فرانس مشاورت میں علاقائی اور عالمی صورتحال پر بھی تبادلہ خیال کیا گیا، دونوں ملکوں کے درمیان اگلے مرحلے کی کثیرالجہتی امور پر مشاورت اسلام آباد میں ہوگی۔
