سینٹرل ڈیولپمنٹ ورکنگ پارٹی کی سیلاب و موسمیاتی تبدیلی سے نمٹنے کی قومی حکمتِ عملی کی منظوری

وفاقی وزیرِ منصوبہ بندی احسن اقبال کی زیرِ صدارت ہونے والے سینٹرل ڈیولپمنٹ ورکنگ پارٹی (سی ڈی ڈبلیو پی) کے اجلاس میں سیلاب و موسمیاتی تبدیلی سے نمٹنے کی قومی حکمتِ عملی کی منظوری دے دی گئی۔

اعلامیے کے مطابق سینٹرل ڈیولپمنٹ ورکنگ پارٹی نے 10 ترقیاتی منصوبوں کی منظوری دی ہے، سی ڈی ڈبلیو پی نے 15.9 ارب روپے کے 5 منصوبے منظور کر لیے۔

127.1 ارب روپے کے 5 بڑے منصوبے ایکنک کو ارسال کر دیے گئے، تعلیم، ماحولیات، آئی ٹی، ٹرانسپورٹ سمیت مختلف شعبوں کے منصوبے زیرِ غور آئے، اجلاس میں نیشنل یونیورسٹی اسلام آباد کے اکیڈمک بلاکس کی تعمیر کی منظوری بھی دے دی گئی۔

اعلامیے کے مطابق فیڈرل بورڈ آف ریونیو (ایف بی آر) کے انفرا اسٹرکچر کو جدید بنانے کا منصوبہ ایکنک کو بھیج دیا گیا ہے، پنجاب لیپ ٹاپ اسکیم کا ترمیم شدہ 27 ارب روپے لاگت کا منصوبہ بھی ایکنک کو ارسال کیا گیا ہے، اسلامیہ کالج یونیورسٹی پشاور کے آئی ٹی ریسرچ سینٹر کے قیام کی منظوری بھی دے دی گئی ہے۔