پاکستان کو سیاسی استحکام اور اتفاق رائے کی ضرورت ہے: صدر آصف زرداری
صدر آصف علی زرداری کا کہنا ہے کہ پاکستان کو اس وقت سیاسی استحکام اور قومی اتفاق رائے کی ضرورت ہے۔ ملکی ترقی و خوشحالی یقینی بنانے کے لیے جمہوری قوتیں ساتھ چلتی رہیں۔
صدر آصف زرداری سے راجا پرویز اشرف کی قیادت میں وفد کی ملاقات ہوئی۔ وفد میں حسن مرتضیٰ، شہزاد چیمہ، اسلم گل، مہر ارشاد اور دیگر شامل تھے۔
ملاقات میں گورنر پنجاب سردار سلیم حیدر خان بھی موجود تھے۔
ملاقات کے دوران ملکی سیاسی و معاشی صورتحال، آئندہ بجٹ اور پارلیمانی امور پر تبادلہ خیال کیا گیا اور وفد نے صدر کو مختلف علاقوں کے عوامی مسائل سے آگاہ کیا اور تجاویز پیش کیں۔
صدر زرداری نے کہا کہ جمہوری قوتیں ساتھ چلیں گی تو عوام کے مسائل کا حل نکالا جا سکتا ہے۔ جمہوریت اور عوامی خدمت کو ہمیشہ مقدم رکھنا چاہیے۔ عوامی مسائل کے حل کے لیے ہر فرد اور مکتبہ فکر کو اپنا کردار ادا کرنا ہوگا۔
ان کا کہنا ہے کہ ملکی ترقی اور خوشحالی کے لیے نوجوانوں کو آگے آنا چاہیے۔ ملکی معیشت مضبوط بنانے کے لیے سب کو مشترکہ حکمت عملی اختیار کرنا ہوگی۔ ملک کو درپیش چیلنجز کے لیے باہمی تعاون، قومی اتحاد اور یکجہتی اہم ہے۔
