کراچی میں کہیں کہیں ہلکی بارش، بوندا باندی کا امکان
محکمہ موسمیات کا کہنا ہے کہ مغربی ہواؤں کا سلسلہ کل ملک کے مغربی علاقوں میں داخل ہو سکتا ہے، ساحلی پٹی پر تیز ہواؤں کے ساتھ کہیں کہیں ہلکی بارش یا بوندا باندی کا امکان ہے۔
کراچی میں بھی اس دوران مطلع ابر آلود اور چند مقامات پر بوندا باندی کا امکان ہے۔
بارش برسانے والا مغربی ہواؤں کا نیا سسٹم کل بروز اتوار بلوچستان میں داخل ہونے کا امکان ہے، اس سسٹم کے تحت صوبے کے 19 اضلاع میں ہلکی بارش اور چمن، پشین، قلعہ عبداللّٰہ، قلعہ سیف اللّٰہ اور زیارت میں پہاڑوں پر ہلکی برفباری کا امکان ہے۔
محکمہ موسمیات کے مطابق کل شام اور رات کے وقت خضدار، چاغی، واشک، سوراب، نوشکی، مستونگ، کوئٹہ، پشین، چمن، لورالائی، قلعہ سیف اللّٰہ، قلعہ عبداللّٰہ اور ژوب میں گرد آلود ہواؤں اور گرج چمک کے ساتھ کل ہلکی بارش کا امکان ہے۔
اس دوران گوادر، کیچ، پنجگور، خضدار، قلات اور خاران اضلاع میں بارش اور ژالہ باری متوقع ہے۔
