وزیرِ اعظم شہباز شریف سے یو ایس انٹرنیشنل ڈیولپمنٹ فنانس کارپوریشن کے سی ای او کی ملاقات
یو ایس انٹرنیشنل ڈیولپمنٹ فنانس کارپوریشن نے پاکستان میں اپنی سرمایہ کاری میں اضافے کی خواہش کا اظہار کیا ہے۔
وزیرِ اعظم شہباز شریف سے چیف ایگزیکٹیو آفیسر انٹرنیشنل ڈیولپمنٹ فنانس کارپوریشن بینجمن بلیک نے ملاقات کی ہے۔
ملاقات میں ڈی ایف سی کے سربراہ سرمایہ کاری کونر کولمین اور ایجنسی کی سینئر قیادت بھی موجود تھی۔
وزیرِ اعظم نے معاشی شراکت داری بڑھانے اور نجی اداروں کے مشترکہ منصوبے متحرک کرنے پر ڈی ایف سی کی تعریف کی۔
اس موقع پر وزیرِ اعظم شہباز شریف نے کہا کہ ڈی ایف سی توانائی، کان کنی و معدنیات، زراعت اور آئی ٹی منصوبوں کے لیے فنانسنگ بڑھائے۔
وزیرِ اعظم شہباز شریف نے ڈی ایف سی کے1 بلین ڈالرز سے زیادہ کے پورٹ فولیو کو سراہا۔
وزیرِ اعظم نے دونوں ممالک کی اقتصادی ترجیحات کے درمیان ہم آہنگی پر روشنی ڈالی اور ڈی ایف سی کو اپریل میں اسلام آباد میں معدنیات کانفرنس میں شرکت کی دعوت دی۔
دوسری جانب بینجمن بلیک نے وزیرِ اعظم شہباز شریف کو ڈی ایف سی کے اسٹریٹجک اقدامات، ترجیحات اور پاکستان میں متوقع پراجیکٹس سے آگاہ کیا۔
