کراچی ایئرپورٹ جانے والے نوجوان سے ہزاروں ڈالر ڈیجیٹل کرنسی اور سامان لوٹ لیا گیا
کراچی میں نوجوان ڈیجیٹل کرنسی، موبائل فون، لیپ ٹاپ اور دیگر سامان لوٹ لیا گیا۔
نوجوان کے والد ریحان کا کہنا ہے کہ میرا بیٹا بدھ کی رات لاہور جانے کے لیے آن لائن ٹیکسی پر گھر سے ایئر پورٹ جانے کے لیے نکلا تھا، ایئر پورٹ کے قریب پیٹرول پمپ پر آن لائن ٹیکسی ڈرائیور پیٹرول ڈلوانے کیلئے رکا۔
انھوں نے بتایا پیٹرول پمپ پر ڈبل کیبن گاڑی میں چار افراد نے اسلحے کے زور پر میرے بیٹے کو اپنی گاڑی میں بٹھایا، مسلح افراد میرے بیٹے کو گاڑی میں ایک گھنٹے سے زائد وقت تک گھماتے رہے۔
نوجوان کے والد نے کہا کہ مسلح افراد نے بیٹے کے ڈیجیٹل اکاؤنٹ سے 8 ہزار 600 ڈالر نکال لیے اور بیٹےکا موبائل فون، لیپ ٹاپ اور دیگر سامان بھی چھین لیا اور تشدد کے بعد اسے کورنگی کے علاقے میں پھینک کر فرار ہو گئے۔
انھوں نے الزام عائد کیا کہ ایئر پورٹ تھانے نے اب تک درخواست بھی وصول نہیں کی۔
دریں اثنا ایس ایس پی ملیر ڈاکٹر عبدالخالق نے کہا کہ واقعے سے متعلق مجھے معلومات نہیں، متعلقہ حکام سے گفتگو کر کے صورتحال مزید واضح ہوسکے گی۔
