سولجر بازار میں گیس لیکیج دھماکے سے منہدم عمارت کا مالک گرفتار

کراچی کے علاقے سولجر بازار میں گیس لیکیج کے باعث ہونے والے دھماکے کے بعد گرنے والی عمارت کے مالک کے خلاف مقدمہ درج کر کے اسے گرفتار کر لیا گیا۔

پولیس کے مطابق مقدمہ سرکار کی مدعیت میں درج کیا گیا ہے جس میں قتل بالسبب، املاک کا نقصان، غفلت، لاپروائی اور دیگر دفعات شامل ہیں۔

مقدمے کے متن کے مطابق عمارت گرنے کے باعث کئی لوگ جاں بحق اور زخمی ہوئے۔

علاوہ ازیں گزشتہ رات پیش آنے والے واقعے کی آج سی سی ٹی وی ویڈیو بھی سامنے آ گئی ہے۔

عمارت میں گیس لیکیج سے دھماکا 3 بجکر 47 منٹ پر ہوا۔

واضح رہے کہ سولجر بازار میں دھماکے سے عمارت منہدم ہو گئی تھی جس سے خواتین اور بچوں سمیت 16 افراد جاں بحق اور 14 زخمی ہو گئے تھے۔