عالمی ریٹنگ ایجنسی موڈیز نے پاکستان کی کریڈٹ ریٹنگ بہتر کردی
عالمی ریٹنگ ایجنسی موڈیز نے پاکستان کی خودمختار کریڈٹ ریٹنگ سی اے اے ون سے بڑھا کر بی 3 کردی ہے، جبکہ پاکستان کی ریٹنگ کا آؤٹ لک مستحکم برقرار رکھا ہے۔
تقریباً 12 ماہ میں موڈیز نے پاکستان کی ریٹنگ دو درجے بہتر کی ہے، ریٹنگ میں بہتری کی بڑی وجوہات میں گورننس میں بہتری، زرمبادلہ کے ذخائر میں مسلسل اضافہ، مقامی قرض لینے کی لاگت میں کمی اور مسلسل میکرواکنامک استحکام شامل ہیں۔
ریٹنگ ایجنسی کا کہنا ہے کہ معاشی استحکام کے باعث پاکستان کی بیرونی کمزوریوں کے خطرات میں کمی آئی ہے، جبکہ بہتر مالیاتی پوزیشن اور مانیٹری پالیسی میں نرمی سے قرضوں کی استطاعت میں بھی نمایاں بہتری آئی ہے۔
ان بہتریوں سے پاکستان کی بیرونی پوزیشن مستحکم اور مالیاتی اشاریے بھی بہتر ہوں گے۔
وزیراعظم شہباز شریف نے موڈیز کی جانب سے پاکستان کی خود مختارکریڈٹ ریٹنگ میں بہتری کا خیر مقدم کرتے ہوئے حکومتی معاشی ٹیم کی کاوشوں کی پزیرائی کی۔
