پی ٹی آئی میں سنجیدہ، باصلاحیت اور اہل رہنما نظر کیے گئے، بیرسٹر سیف
سابق مشیر اطلاعات خیبر پختونخوا حکومت بیرسٹر سیف نے کہا ہے کہ پی ٹی آئی میں سنجیدہ، باصلاحیت اور اہل رہنماؤں کو نظر انداز کیا گیا ہے۔
پشاور میں جیو نیوز سے ٹیلیفونک گفتگو میں بیرسٹر سیف نے کہا کہ بانی پی ٹی آئی سے وکلاء کی ملاقاتیں خوش آئند اور نیک شگون ہیں۔
انہوں نے کہا کہ پی ٹی آئی کی موجودہ قیادت میں تبدیلی کی اشد ضرورت ہے، پارٹی کے اندر سنجیدہ، تجربہ کار اور اہل رہنماؤں کو نظر انداز کیا گیا ہے۔
بیرسٹر سیف نے مزید کہا کہ پی ٹی آئی کو سنجیدہ اور باصلاحیت رہنماؤں کو دوبارہ آگے لانا ہوگا، پارٹی میں فیصلہ سازی کا عمل اہل اور تجربہ کار قیادت کے ہاتھ میں ہونا چاہیے۔
اُن کا کہنا تھا کہ سنجیدہ قیادت سامنے آئے تو پارٹی کے اندرونی اختلافات اور گروپ بندی ختم ہوسکتی ہے، اہل قیادت کی موجودگی سے پارٹی میں سیاسی انتشار کم کرنے میں مدد ملے گی۔
سابق مشیر اطلاعات خیبر پختونخوا نے یہ بھی کہا کہ پی ٹی آئی کو موجودہ سیاسی صورتحال میں دانشمندانہ فیصلوں کی ضرورت ہے، پارٹی کو ذاتی اختلافات کے بجائے اجتماعی مفاد کو ترجیح دینی چاہیے۔
انہوں نے کہا کہ پارٹی کے اندر مشاورت اور اتفاق رائے کے کلچر کو فروغ دینا ہوگا، پی ٹی آئی کو اپنی صفوں میں اتحاد اور یکجہتی پیدا کرنا ہوگی۔
بیرسٹر سیف نے کہا کہ سیاسی معاملات کو محاذ آرائی کے بجائے مذاکرات کے ذریعےحل کرنے کی ضرورت ہے، پارٹی کی مضبوطی کے لیے سنجیدہ سیاسی حکمت عملی اپنانا ناگزیر ہے۔
