کابینہ ارکان، پارلیمنٹرینز نے مکہ معاہدے کو سنگ میل قرار دے دیا
وفاقی وزرا، وزرائے مملکت اور کابینہ ارکان نے پاکستان، ترکیہ اور سعودی عرب کے امن معاہدے کو سنگ میل قرار دے دیا۔
پاکستان، ترکیہ اور سعودی عرب میں مکہ امن معاہدے سے متعلق کابینہ ارکان اور پارلیمنٹرینز کا کہنا تھا کہ مکہ معاہدہ امن سلامتی اور استحکام کی جانب سنگ میل ہے۔
اس حوالے سے وفاقی وزیر احسن اقبال، عطا تارڑ، اویس لغاری، طارق فضل چوہدری، علی پرویز ملک، امیر مقام، عبدالعلیم خان، شزا فاطمہ، رانا ثناء اللّٰہ، دانیال چوہدری و دیگر نے اظہار خیال کیا۔
ان کا کہنا تھا کہ وزیراعظم شہباز شریف اور فیلڈ مارشل عاصم منیر کی قیادت میں مشترکہ وژن حقیقت میں بدلا۔ پاکستان، ترکیے اور سعودی عرب کا دفاعی معاہدہ تینوں ملکوں کے مفاد میں ہے۔
کابینہ ارکان اور پارلیمنٹرینز نے مزید کہا کہ پاکستان کو تاریخی کامیابی ملی ہے، دفاعی معاہدے سے خطے میں امن و استحکام کے نئے دور کا آغاز ہوگا۔
انہوں نے یہ بھی کہا کہ ایک ملک پر حملہ تینوں ممالک پر حملہ تصور ہوگا، تاریخی معاہدے سے امن کی راہیں ہموار ہوئیں۔ دفاعی معاہدے سے پاکستان کا وقار دنیا بھر میں بلند ہوا۔
احسن اقبال نے کہا کہ پاکستان کو تاریخی کامیابی ملی ہے، دفاعی معاہدے سے خطے میں امن و استحکام کے نئے دور کا آغاز ہوگا۔
عطا تارڑ نے کہا کہ مکہ معاہدہ امن سلامتی اور استحکام کی جانب سنگ میل ہے، عوام نے اس کا خیر مقدم کیا ہے، یہ معاہدہ تینوں ممالک کے مفاد میں ہے۔
اویس لغاری نے کہا کہ پاکستان، سعودی عرب اور ترکیے کے درمیان دفاعی معاہدہ خوش آئند ہے، معاہدہ تینوں ممالک کے عوام کے تحفظ کا ضامن ہے، مکہ دفاعی معاہدے سے خطے میں امن قائم ہوگا۔
طارق فضل چوہدری کا کہنا تھا کہ تاریخی معاہدہ ہماری قیادت کے وژن کا عکاس ہے۔ معاہدے سے تینوں ملکوں کے درمیان تعلقات مزید مضبوط ہوں گے، معاہدہ امت مسلمہ کےلیے خیر کا باعث ثابت ہوگا، یہ امید کی نئی کرن ہے۔
علی پرویز ملک نے کہا کہ دفاعی معاہدہ امت مسلمہ کے اتحاد کی جانب قدم ہے، امیر مقام نے کہا کہ وزیراعظم کی قیادت میں پاکستان کو دنیا بھر میں تاریخی کامیابیاں مل رہی ہیں۔
عبدالعلیم خان نے کہا کہ معاہدے سے اسلامی ملکوں کے درمیان بھائی چارے کو فروغ ملے گا۔ اس پر پوری قوم اور امت مسلمہ کو مبارک باد دیتا ہوں۔
شزا فاطمہ نے کہا کہ دنیا اب پاکستان کو امن کے داعی کے طور پر جانتی ہے، تاریخی معاہدے سے امن کی راہیں ہموار ہوئیں۔ پاکستان کا وقار دنیا بھر میں بلند ہوا۔
رانا ثناء اللّٰہ نے کہا کہ مکہ کی مقدس زمین پر تاریخی معاہدہ ہونا پاکستان کےلیے اعزاز ہے، برادر اسلامی ملکوں کے درمیان معاہدے سے امن کی نئی راہیں ہموار ہوں گی۔
انہوں نے کہا کہ دفاعی معاہدے کےلیے وزیراعظم، فیلڈ مارشل کی کاوشیں قابل تحسین ہیں۔ معاہدہ امت مسلمہ کے اتحاد کا باعث بنے گا، جس سے اسلامی ملکوں کی ترقی و خوشحالی کا نیا دور شروع ہوگا۔
دانیال چوہدری نے کہا کہ مکہ مشترکہ دفاعی معاہدہ پاکستان کےلیے بڑا سفارتی و دفاعی سنگ میل ہے۔ وزیراعظم اور فیلڈ مارشل سید عاصم منیر کی قیادت نے تاریخی دفاعی معاہدہ ممکن بنایا۔
