کراچی میں 19 سال سے گاڑیاں چوری کرنے والا ملزم مقابلے میں ہلاک

کراچی کے علاقے شاہ فیصل کالونی نمبر 5 میں اینٹی وہیکل لفٹنگ سیل کا کار لفٹروں سے مقابلہ ہوا جس میں شہر میں 19 سال سے گاڑیاں چوری کرنے والا ملزم ہلاک ہو گیا۔

پولیس حکام کے مطابق ہلاک ملزم محمد بروہی پر کراچی کے مختلف تھانوں میں 47 مقدمات درج تھے، ہلاک ملزم ماضی میں 7 مرتبہ گرفتار ہو چکا تھا۔

حکام کا کہنا ہے کہ ہلاک ملزم بین الصوبائی کار لفٹر گینگ کا کارندہ تھا، پولیس مقابلے کے دوران ملزم کے 2 ساتھی فرار ہو گئے۔

پولیس حکام نے کہا ہے کہ ہلاک ملزم سے سعیدآباد تھانے کی حدود سے چوری کی گئی کار اور اسلحہ برآمد ہوا ہے، ملزم گاڑی چوری، پولیس مقابلے، اسلحہ اور منشیات کے مقدمات میں ملوث تھا۔ 

پولیس کا کہنا ہے کہ فرار ساتھیوں کی گرفتاری کے لیے مختلف مقامات پر چھاپے مارے جا رہے ہیں۔