یونان کشتی حادثے کا مرکزی ایجنٹ گرفتار

فیڈرل انویسٹی گیشن ایجنسی (ایف آئی اے) نے 2024 یونان کشتی حادثے کے مبینہ انسانی اسمگلر اور مرکزی ایجنٹ کو گجرات سے گرفتار کرلیا۔

ایف آئی اے کے مطابق مرکزی ملزم اشرف اقبال المعروف اشرف سلیمی گرفتاری سے قبل مسلسل روپوش رہا، ملزم کا تعلق پھالیہ سے ہے۔

ملزم نے منڈی بہاءالدین کے گاؤں ہیلاں سے تارکین وطن کو یونان بھیجا تھا اور فی کس 25 لاکھ روپے وصول کیے تھے۔ ہیلاں گاؤں کے کئی نوجوان کشتی الٹنے کے حادثے میں جاں بحق ہوئے تھے۔

ترجمان ایف آئی اے کے مطابق گرفتار ایجنٹ کا تعلق 2024 کے ہولناک لیبیا اور یونان کشتی سانحات سے ہے، مزید تفصیلات اور گرفتار افراد کے انکشافات پر تفتیش جاری ہے۔