افسوس بھارت نے سیاست کو مذہب سے جوڑ دیا: رمیش سنگھ اروڑا
وزیر اقلیتی امور پنجاب رمیش سنگھ اروڑا نے کہا ہے کہ ایران عراق جنگ کے دوران مذہبی مقامات کی یاترا بند نہیں ہوئی تھی، افسوس بھارت نے سیاست کو مذہب سے جوڑ دیا۔
رمیش سنگھ اروڑا نے واہگہ بارڈر پر سکھوں کا علامتی استقبال کیا۔
واہگہ بارڈر پر صوبائی وزیر رمیش سنگھ اروڑا نے میڈیا سے گفتگو کے دوران کہا کہ بھارت نے سکھوں کو گرو ارجن دیو جی کی برسی پر پاکستان آنے سے روک دیا، بھارت نے سیاست کو مذہب کے ساتھ جوڑ دیا ہے۔
انہوں نے مزید کہا کہ آج ہم بھارت سے سکھوں کو نہ آنے دینے پر احتجاج کرتے ہیں، بھارتی وزیرِ اعظم نے کہا کہ پاکستان سے سیز فائر ہو تو جانے دیں گے، سیزفائر ہو گیا اب مودی کو سکھوں کو پاکستان آنے سے نہیں روکنا چاہیے۔
رمیش سنگھ اروڑا کا یہ بھی کہنا تھا کہ بھارتی سکھوں کے لیے پاکستان کے دروازے ہمیشہ کھلے ہیں، ہم پاکستانی ہمیشہ محبت، امن اور جوڑنے کی بات کرتے ہیں۔
