سرداروں کی خواہش ہے کہ مجھے ڈرا اور روتا ہوا دیکھیں، یہ حسرت کبھی پوری نہیں ہو گی: امِ رباب

دادا، والد اور چچا کے تہرے قتل کیس کے فیصلے پر امِ رباب چانڈیو نے ویڈیو بیان جاری کر دیا۔

امِ رباب چانڈیو نے کہا کہ آج میرے والد، چچا اور دادا کے قتل میں ملوث 8 ملزمان کو باعزت بری کر دیا گیا۔

انہوں نے کہا کہ سرداروں کی خواہش ہے کہ وہ مجھے ڈرا ہوا اور روتا ہوا دیکھیں، تاہم یہ حسرت کبھی پوری نہیں ہو گی۔

امِ رباب کا کہنا ہے کہ میرے حوصلے پہلے کی طرح آج بھی بلند ہیں اور ہم کسی دباؤ میں نہیں آئیں گے۔

انہوں نے اعلان کیا کہ عدالتی فیصلے کے خلاف ہائی کورٹ سے رجوع کیا جائے گا۔

ام رباب چانڈیو نے کہا کہ انصاف میرا حق ہے اور میں اسے حاصل کر کے رہوں گی۔